Mashali 29
Proverbs 29 WLC
1איש תוכחות מקשה־ערף פתע ישבר ואין מרפא׃

2ברבות צדיקים ישמח העם ובמשל רשע יאנח עם׃

3איש־אהב חכמה ישמח אביו ורעה זונות יאבד־הון׃

4מלך במשפט יעמיד ארץ ואיש תרומות יהרסנה׃

5גבר מחליק על־רעהו רשת פורש על־פעמיו׃

6בפשע איש רע מוקש וצדיק ירון ושמח׃

7ידע צדיק דין דלים רשע לא־יבין דעת׃

8אנשי לצון יפיחו קריה וחכמים ישיבו אף׃

9איש־חכם נשפט את־איש אויל ורגז ושחק ואין נחת׃

10אנשי דמים ישנאו־תם וישרים יבקשו נפשו׃

11כל־רוחו יוציא כסיל וחכם באחור ישבחנה׃

12משל מקשיב על־דבר־שקר כל־משרתיו רשעים׃

13רש ואיש תככים נפגשו מאיר־עיני שניהם יהוה׃

14מלך שופט באמת דלים כסאו לעד יכון׃

15שבט ותוכחת יתן חכמה ונער משלח מביש אמו׃

16ברבות רשעים ירבה־פשע וצדיקים במפלתם יראו׃

17יסר בנך ויניחך ויתן מעדנים לנפשך׃ פ

18באין חזון יפרע עם ושמר תורה אשרהו׃

19בדברים לא־יוסר עבד כי־יבין ואין מענה׃

20חזית איש אץ בדבריו תקוה לכסיל ממנו׃

21מפנק מנער עבדו ואחריתו יהיה מנון׃

22איש־אף יגרה מדון ובעל חמה רב־פשע׃

23גאות אדם תשפילנו ושפל־רוח יתמך כבוד׃

24חולק עם־גנב שונא נפשו אלה ישמע ולא יגיד׃

25חרדת אדם יתן מוקש ובוטח ביהוה ישגב׃

26רבים מבקשים פני־מושל ומיהוה משפט־איש׃

27תועבת צדיקים איש עול ותועבת רשע ישר־דרך׃ פ

Hebrew OT: WLC (Consonants Only)

For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others.

Bible Hub
Proverbs 28
Top of Page
Top of Page